-
Бөлісу:
-
-
-
«Достық» үйінде жалғасқан форумның секциялық отырысы ғасырға жуық тарихы бар колледждің қысқаша тарихы баяндалған бейнеролик көрсетілімімен басталды. Салтанатты шара басында ҚР Білім және ғылым бірінші вице-министрі Шолпан Таңатқызы және аймақ басшысы Нұрлыбек Мәшбекұлы білім ұясы ұжымын мерейтоймен құттықтап, форумға қатысушыларға сәттілік тіледі. Ж.Мусин атындағы Көкшетау жоғары қазақ педагогикалық колледжі студенті Яна Крючек ғасырға жуық тарихы бар ұлағат ұясы ұжымын мерейлі мерекемен құттықтап, өзі қатарлы замандас жастардың мәртебелі маман болуына тілек білдірді.
Форумға қатысушылар назарына колледжіміздің «Информатика» мамандығының бітіруші курс студенті Бақбергенов Руслан цифрлық технологияға негізделген «ҮЙДЕН ОҚЫТУ: ВИРТУАЛДЫ СЫНЫП» тақырыбындағы жаңа жобасын ұсынды. Аталған жобаға өңір басшысы Нұрлыбек Мәшбекұлы оң бағасын беріп, Облыстық білім басқармасына жобаның әрі қарай жүзеге асуына қолдау білдіруге тапсырма берді.
Сан мыңдаған шәкірттің саналы ғұмырына дем беріп, өз саласының үздік маманы болуға даңғыл жол салған оқу орнының жұлдызды түлегінің бірі – «QAZSport» телеарнасының директоры Нағи Бақытбек білім алған қара шаңырағын арнайы құттықтай келіп, ұстаздар қауымына, оқу орны ұжымына ыстық ықыласын білдірді. Осындай айтулы түлектердің бірі – дзюдодан жасөспірімдер арасында олимпиада чемпионы Бауыржан Жауынтаев және «WordSkills Kazakhstan - 2019» республикалық чемпионатының күміс жүлдегері Аяулым Сарманованың бейнеқұттықтаулары көрсетілді. Мерейтой жиынының мәртебелі меймандарының бірі ҚХА жанындағы Аналар кеңесінің төрайымы, ҚР Мәдениет қайраткері Шанай Нәзипа Ыдырысқызы мерекелік шара жайлы жылы лебізімен бөлісті.
Форум аясындағы ерекше сәттің бірі – «Мәншүк» атындағы стипендияның табысталуы. Атаулы шәкіртақыға алдын-ала ұсынылған критерийлер білімі мен тәрбиесін, көшбасшылық қасиетін көрсете білген, жаңашыл студент «Шетел тілі» мамандығының білім алушысы Биназир Алиханқызы ие болды. Облыс әкімі жеңімпаз студенттің атын жариялап, стипендия сертификатын табыстады. «ТОП – 100 студент» байқауының жеңімпазы – Бекзат Ешмұратов пен «WordSkills Kazakhstan – 2021» сайысының күміс медаль иегері Камила Сақтапберген форумға қатысушы жастар атынан үндеу жеткізді. Айтулы шара колледж жастарынан құралған «Жалын» квартетінің «Тек алға» патриоттық әнімен тәмамдалды.