ӘЛЕМДІ МЕЙІРІМ ҚҰТҚАРАДЫ

Қайырымдылық – халқымыздың ең ізгі қасиеттерінің бірі. Шын мұқтажға
жүрек жылуын ұсыну, сауабы мол іске атсалысу – әрбір адамның азаматтық парызы. Осы орайда М.Мәметова атындағы Қызылорда педагогикалық жоғары колледжінде «Әлемді мейірім құтқарады» атты жақсылыққа бағытталып, жан жылуына арналған қайырымдылық шарасы өтті.

Жанашыр жастар бас қосқан қайырымдылық акциясында студент қыздар пісірген тәттілерін сатылымға қойды. Ұлы іске ұлағат ұясының ұжымы дастарханнан дәм татып, қайырымдылыққа үлес қосып, көтеріңкі көңіл-күйде тарқасты. Ізгілікті жанына серік еткен жастардың ең игі істерінің бірі – мұқтаж жандарға қамқорлық жасау. Аталмыш жәрмеңкеден түскен қаражат алдағы уақытта қайырымдылық шарасына жұмсалатын болады. Колледжімізде осындай қайырымды іс-шаралар алдағы уақытта да жалғасын табады деген сенімдеміз.