МӘНШҮК ЕРЛІГІ – ӨШПЕС ӨНЕГЕ

Оқу орнымызда М.Мәметованың туған күніне орай "Мәншүк ерлігі- өшпес өнеге" тақырыбымен еске алу кеші өтті.

Колледждің ең үздік, белсенді және жетістігі мол "Мәншүк" тобымен ҚР ҰҚК Шекара қызметі Қызылорда облысы бойынша департаментымен бірлесе ұйымдастырылған шарада жауынгер ару рухына арналған ән шырқалып, колледж ауласындағы "Мәншүк" ескерткішіне гүл шоқтары қойылып, рухы бір минут үнсіздікпен еске алынды.

Еске алу кешінің алғы сөзінде колледж директоры Ж.Тоғанова М.Мәметованың ерлігі мен қайсарлығына тоқтала келіп, батыр қыздың рухы тек бір шараның, бір жылдың көлемінде ғана ұлықталмай, өскелең ұрпаққа үлгі ретінде әр күні насихатталатынын айтты.

Шара барысында "Жас сарбаз" және "Жас шекарашы" клубтарының жаңа мүшелеріне ант қабылдау рәсімі өтті. Қызылорда облыстық ауған соғысы ардагерлер ұйымының төрағасы Баймағанов Қайраддин мырза және "Застава тарландары", шекарашы ардагерлер Республикалық қоғамдық бірлестігінің Қызылорда облысы бойынша филиалының төрағасы Асан Беркімбекұлы жас сарбаздарға сәттілік тілеп, ұлттың қауіпсіздігіне жауапты екендіктерін тілге тиек етті.

Ашық аспан астында жиылған жұртшылыққа ҚР Ұлттық Қауіпсіздік комитеті шекара қызметі Қызылорда бойынша департаменті және клуб қатысушыларының арнайы дайындаған әскери ұрысынан көрініс қойылып, шара соңында "Жас сарбаз" және "Жас шекарашы" клубтарының мүшелері мен шара қонақтарына видеоролик көрсетілді.