ҰЛТТЫҚ ҚҰНДЫЛЫҚТАР – ТӘРБИЕНІҢ ТҮП ҚАЗЫҒЫ

М.Мәметова атындағы Қызылорда педагогикалық жоғары колледжінде Қазақстан халқы Ассамблеясы жанындағы республикалық Аналар кеңесінің төрағасы Нәзипа Шанаимен «Ұлттық құндылықтар – тәрбиенің түп қазығы» тақырыбында кездесу өтті.

Алдымен шара қонақтарын колледж басшысы Жақсыгүл Тоғанова мен өнерпаз ұстаздар қарсы алып, оқу орны тарихымен және бүгінгі тыныс-тіршілігімен таныстырды. «Қазақ тілі мен әдебиеті» мамандығының 4 курс студенті Нұрхан Диана Облыстық Қазақстан Халқы Ассамблеясы жанындағы Аналар кеңесі мен М.Мәметова атындағы Қызылорда педагогикалық жоғары колледжінің бірлескен әлеуметтік жобасы болып табылатын «Көшбасшы мектебі» қыздар клубының жұмысымен таныстырып, құрметті қонақтарымызға қыздарымыздың қолдарынан шыққан тақияларды естелік ретінде табыстады.

«Анаға тағзым» республикалық форумы аясында өңірімізге келген мерекенің басты мейманы сөз алып, елге келгендегі ең үлкен мақсатын орындап, колледжіміздің бойжеткен қыздарымен сыр-сұхбат жүргізді. Басқосуға мәртебелі мейманымызбен қоса колледж директоры Жақсыгүл Тоғанова және ұстаздар мен студенттер қатысты.

Мерейлі мезетте Назипа Ыдырысқызына «Ықылас» гүлі тарту етіліп, кеш соңы колледж оқытушысы, Қазақстанның мәдениет саласының үздігі А.Кенжеғараеваның орындауындағы «Қыздар, қыздар» әнімен тәмамдалды.