-
Бөлісу:
-
-
-
13 желтоқсан күні Қазақстан Республикасының Тәуелсіздік күніне орай Қызылорда облысы білім басқармасы мен М.Мәметова атындағы Қызылорда педагогикалық жоғары колледжінің ұйымдастыруымен колледж студенттерінің арасында «Тәуелсіздікті жырлайды еркін елдің жастары!» атты облыстық жыр мүшайрасы ұйымдастырылды. Мақсаты - Тәуелсіз Қазақстанның жетістіктерін жырлау, тарихқа үңілу, егемендік жолында ерлік еткен тұлғалардың есімін жастар санасында қайта жаңғырту, жастарды ана тілін, төл мәдениетін, туған тарихын құрметтеуге шақыру. Колледж студенттері арасында өткізілген қауырсын қалам иелерінің сайысына Қазалы көлік-техникалық жоғары колледжі, И.Әбдікәрімов атындағы Қызылорда аграрлық техникалық жоғары колледжі, «Болашақ»университетінің жоғары колледжі, Қызылорда медициналық жоғары колледжі, Қызылорда жоғары көпсалалы колледжі, Арал көпсалалы колледжінің жас өрендері бақ сынады. Жыр мүшайрасының ережесіне сай ақындар өз шығармашылығынан Тәуелсіздік тақырыбындағы өлеңдерін оқып, жырдан шашу шашып, көрермендерге көтеріңкі көңіл күй сыйлады. Сайысқа Қорқыт ата атындағы Қызылорда мемлекеттік университетінің қазақ тілі мен әдебиеті және журналистика кафедрасының аға оқытушысы, филология ғылымдарының кандидаты Бекмағанбетова Гүлмира Шанжарханқызы, «Әлімсақ» журналының тілшісі, «Баспалдақ» жыр жинағының авторы Сайлау Айдар, Қорқыт ата атындағы Қызылорда мемлекеттік университетінің магистранты Аружан Оралбай жас қаламгерлер қабілетін таразылап, әділ қазылық етті. Төрешілердің шешімімен: І орын – Бұрхат Зере – М.Мәметова атындағы Қызылорда педагогикалық жоғары колледжі ІІ орын – Қуанышбай Гүлім – М.Мәметова атындағы Қызылорда педагогикалық жоғары колледжі ІІ орын – Досмайлов Нұрсұлтан – «Болашақ» университетінің жоғары колледжі ІІІ орын – Сақтаған Аружан – М.Мәметова атындағы Қызылорда педагогикалық жоғары колледжі ІІІ орын – Жалғасбек Мирас – М.Мәметова атындағы Қызылорда педагогикалық жоғары колледжі ІІІ орын – Оразғали Бекарыс - Қазалы көлік-техникалық жоғары колледжі иеленіп, ерекше өнер көрсеткен қатысушыларға «Алғыс хат» табысталды.