-
Бөлісу:
-
-
-
М.Мәметова атындағы Қызылорда педагогикалық жоғары колледжінде ардагер ұстаздардың қатысуымен «Тұлғалар тағылымы – ұрпаққа өнеге» тақырыбында мерекелік әдеби-сазды кеш өткізілді. Салтанатты шараға Облыстық білім басқармасының басшысы М.З.Шермағанбет, техникалық және кәсіптік білім беру ұйымдарының басшылары, колледж директоры Ж.Қ.Тоғанова, сонымен қатар ардагер ұстаздар мен мерейтой иелері және бірқатар оқытушылар қатысты.
Кездесу шарасы ардагерлерді салтанатты түрде күтіп алумен басталды. Шараның басталуында мерекеге орай экранда ұлттық нақышта тәуелсіздікке жету жолы бейнеленген ролик көрсетіліп, батыр киімін киген 7 жігіттің жалынды сөздерімен басталып, «Мереке» биіне жалғасты.
Болашақ мамандарға сапалы білім мен тәлім-тәрбие беру жолында М.Мәметова атындағы Қызылорда педагогикалық жоғары колледжінің де алар орны ерекше. Айта кетейік, биылғы жылы колледждің 90 жылдық, Мәншүк Мәметованың 100 жылдық мерейтойы атап өтілді. Іргелі оқу орнының жетістіктерімен танылып, биік деңгейде көрінуіне колледжде аянбай еңбек еткен ұйымшыл ұжымның үлесі зор. Колледж тарихы мен ардагер ұстаздардың өткен өмірінің естеліктерінен сыр шерткен бейнеролик көрермен назарына ұсынылды.
Биылғы жылы колледждің 90 жылдық мерейлі мерекесімен қатар ардагер ұстаздарымыз Әбдіқалықова Әлима Жақыпқызы – 70 жасқа, Тоқмағанбетова Аягөз Асқарқызы – 75 жасқа, Бектұрғанов Марат Шаяхметұлы – 80 жасқа, Дүйсебаева Зейнеп Қалдыбайқызы – 80 жасқа, Әлішова Гүлжан Қалдыбекқызы – 65 жасқа толып отыр. Мерейтой иелерін құттықтау үшін алғашқы сөз кезегі Облыстық білім басқармасының басшысы Мейрамбек Зинабдинұлына беріліп, ардагер ұстаздарға құрмет көрсетілді.
Ұлағат иелерін мерейлі мерекесімен колледж түлектері Ж.Сүлейменова, Г.Оразымбетова құттықтап, арнайы дайындалған бейнематериал экраннан көрсетілді. Ізгі тілектерді жалғастыра келе, колледж түлектері А.Абибуллаева, А.Айтбаева, А.Абдуллаева сахнаға шығып, аяулы ұстаздарына құттықтау тілектерін білдіріп, Айқын Кенжеғараева «Көңіл толқуы» әнін арнады.
Кеш барысында колледж тынысы, ұстаздар өмірі бейнеленген би қойылымымен басталып, «Япурай» хорының орындауында «Іңкәрім-ай», «Ұстазыма» әндері тарту етілді. Салтанатты жиын жалғасы мерекелік концертке ұласып, колледж өнерпаз ұстаздары мен студенттері әдеби-хореографиялық қойылым, «Япурай» хорының әндер шеруі мен «Нұргүл» халықтық би-ансамбльінің ұлттық билер топтамасы көрермен назарына ұсынылды.
Әдеби-сазды кеште ардагер ұстаздарымыз естеліктерімен бөлісіп, жоғары деңгейде ұйымдастырылған шара үшін колледж басшысы Жақсыгүл Қоханқызы мен колледж ұжымына жылы лебізі мен ризашылықтарын білдірді.
Атқарылған істерді бедел биігінен түсірмей, абыроймен жалғап, аманатқа адал болған ізбасарларыңыз аға ұрпақтың ерен еңбегіне мың тағзым етеді! Жол нұсқар ақылшымыз болып, әрдайым аман жүріңіздер! Бейбітшілігіміз баянды, елдігіміз тұрақты болсын!