-
Бөлісу:
-
-
-
Бүгін оқу орнымызда «М.Мәметова атындағы Қызылорда қазақ қыздар педагогикалық училищесінің» алғашқы түлегі қонақ болды.1952-1956 жылдары «Бастауыш класта оқыту» мамандығы бойынша білім алған Қарабаева Күлбараш Әбдіғалиқызы - қазіргі Ұлытау облысы Жезқазған қаласының тұрғыны, «ҚР білім беру ісінің үздігі» төсбелгісінің иегері. Білім алған оқу орнын көргелі келген табысты түлек «Білім нұры» педагогикалық сабақтастық галереясын аралап, жылдармен жаңғырған колледждің келбетін, жетістігін, табысын, сабақтастық дәстүріне ризалығын білдірді. Еңбек жолын бастауыш сынып мұғалімі ретінде бастаған Күлбараш Әбдіғалиқызы «Пионерлер Үйі» меңгерушісі, балабақша меңгерушісі, облыстық мәслихат депутаты болып абыроймен атқарған қызметтерінде жеткен жетістіктерін осы оқу орнымен байланыстырады. Ардагер-ұстаз жас ұрпаққа оқу мен тәлім-тәрбиені бірге беріп отырған қара шаңыраққа алғысымен қатар батасын да берді. «Үлкенді сыйлау - кісілік» деп білетін колледж директоры Жақсыгүл Қоханқызы өз кезегінде Күлбараш Әбдіғалиқызына қара шаңырақтың тарихы туралы «Ұлағат ұясы» және оқу орнының 90 жылдық мерейтойы қарсаңында тұсауы кесілген «Білім шамшырағы» кітаптарын ілтипатпен ұсынып, колледж ұжымы атынан алғысын білдірді.1932 жылы іргетасы қаланған қара шаңырақ 1952 жылы Алматы педагогикалық училищесімен біріктіріліп, Кеңес Одағының батыры Мәншүк Мәметованың есімі берілген. Үстіміздегі жылы қара шаңыраққа - 90, Кеңес Одағының батыры М.Мәметованың туғанына - 100, оқу орнымызға батыр қыз есімі берілгеніне - 70 жыл толып отыр.